Опубликовано: 09.04.2019

“Үлэ күүһэ 2019”  диэн ааттаах күрэхтэһии Мэҥэ-Хаҥалас Нуораҕана ытык сиригэр олус үчүгэй тэрээһиннээхтик буолан ааста. Үлэҕэ анаммыт күрэх аан бастакынан Нуораҕана төрүт олохтоохторугар, саастарын тухары манна үлэлээн-хамсаан, оҕо-уруу тэринэн, иитэр сүөһүнү күрүөлээн олорбут икки Мэхээлэ — Михаил Федорович уонна Михаил Иванович Борисовтар сырдык кэриэстэригэр ананан ыытылынна. Саастарын тухары үлэни өрө тутан үлэлээн-хамсаан, биир дойдулаахтарын ытыктабылларын ылыахтарын ылбыт ытык кырдьаҕастар бу орто туруу бараан дойдуга үтүө суобастаахтык олорон ааспыт үтүөлэрин бэлиэтинэн буолла. Мэхээлэлэр элбэх ахсааннаах оҕолоро, сиэннэрэ бары туруу үлэһит буолбут дьон сүргэлэрэ көтөҕүллэн туран, биир киһи курдук эһэлэрин үйэтитэр тэрээһини иилээн-саҕалаан тэрийбиттэрэ хайҕаллаах дьыала. Борисовтар сыдьааннара бөдөҥ урбаанньыттар, меценаттар Руслан Федотов,  Вячеслав Нестеров уонна Борисовтар оҕолоро, сиэнэрэ буолан, биир дойдулаахтарын, аймахтарын үтүө дьыалаҕа түмтүлэр.

         Үлэ бырааһынньыга Нуораҕана эбэ үрдүгэр ыытыллар “Үлэ күүһэ” үтүө санаа тэрээһинэ үөрүүлээх аһыллыытыгар күрэхтэһии кыттыылаахтара дойдуларын ааттатар былаахтар сааскы сайдам салгыҥҥа оҕустаран өрө көтөн тэлибирии көтөөттөрүн кытта паараадтаан киирбиттэрэ көрөргө үчүгэйэ сүрдээх! Нэһилиэк эр хоһууннара  үтүө санаанан салайтаран, биир дойдулаах аҕа саастаах ветераннарыгар анаан мас бэлэмнииргэ туруннулар. “Үлэ күүһэ 2019” күрэхтэһиигэ Чурапчы Чыаппаратыттан, Мэҥэ-Хаҥалас Тумулуттан, Нуораҕаныттан (икки хамаанда), Төҥүлүттэн, Балыктааҕыттан  алта хамаандаҕа алталыы киһи киирэн, иккилии лесовоһунан толору тиэллэн кэлбит 8-9 миэтэрэ уһуннаах мастары эрбээн, хайытан, сааһылаан туттардылар. Ким инники бүтэрбит — ол кыайыылаах.

Киһи хараҕынан көрөн саллар өрөһөлүү кыстанан сытар мастары уһун күнү быһа бэлэмнииллэрэ буолуо дии санаабытым баара, отчут-масчыт тыа эр дьоно барахсаттар тохтоло суох тигинэччи үлэлээн, чаастан эрэ ордук кэминэн эрбээн, хайытан кыстыы охсон кэбистилэр. Дружба ыллыыр, мас охсуллар тыаһа киһи кутун ортотунан киирэр буоллаҕа! Көрөөччү олус элбэх. Биир дойдулаахтарыгар “ыалдьа” турар кырдьаҕастыын кэпсэттим. “Биһиэхэ гаас киирэн, мас мастыыр диэни умна быһыытыйдыбыт. Ол эрэн, уолаттар бэккэ баран иһэллэр”,- диир Тумул олохтооҕо Егор Титов. Кини билигин эр дьон үлэтэ чэпчээтэ, дьиэ үлэтэ диэн муус киллэриитэ хаалла диир. Кырдьаҕас бэлиэтээбитин курдук, кырдьыга даҕаны, гаазтаах бөһүөлэк дьоно күн аайы маһынан оттор нэһилиэк олохтоохторугар кыайтардылар. Иннэ гынан, бастакы миэстэҕэ Нуораҕана — 1  хамаандата таҕыста. Иккис миэстэҕэ Нуораҕана — 2 буолла. Чыаппаралар үһүс миэстэҕэ тигистилэр.

“Мастаммыт оттук мас барыта Нуораҕана кырдьаҕас олохтоохторугар тарҕанар. Онон бу тэрээһиммит көмө-тирэх буолар сыаллаах. Ону кытта кэлбит дьоннорго анаан араас бириистэри туруоран оонньоттубут, онтон киирбит үп нэһилиэк баанныьыгын саҥардан тутууга барыаҕа. Биһиги тэрээһиммит табыллан, дьон-сэргэ хото кэлэн, үөрэн-көтөн тарҕаспытыттан олус астынныбыт. Үтүө дьыала үтүөнэн саҕыллара диэн бу буолар. Биһиги халыҥ аймах, ытыктыыр эһээлэрбит ааттарын ааттатаары, биир дойдулаахтарбытын өйөөрү, сомоҕолоору бу курдук үлэ күрэхтэһиитин тэрийдибит. Дьабыыл нэһилиэгин баһылыгар Сергей Сергучевка, нэһилиэк бары олохтоохторугар уонна күрэх кыттыылаахтарыгар  дириҥ махталбытын тириэрдэбит. Бу курдук наар үлэни өрө тутан олордохпутуна кыайыылаах-хотуулаах буоларбыт саарбаҕа суох. Олохтоох дьон баҕаларын учуоттаан, бу курдук тэрээһини салгыахпыт дии саныыбыт, — диир НХЗ GROUP генеральнай директора Вячеслав Нестеров.

Нуора5ана сэбиэтин депутата, тэрээһини иилээн-саҕалаан тэрийсибит киһи Валентина Нестерова “Үлэ күүһэ” бырааһынньык нэһилиэк олохтоохторун сэргэхситтэ, сомоҕолоото диир. “Эр дьоммут тыаттан мас мастаан тиэйэн аҕалбыт мастарын күрэх кыттааччылара бэлэмнээтилэр, билигин уталыппакка маска наадыйан олорор аҕам саастаах ыалларбытыгар тиэргэннигэр тиэйэн илдьиэхпит, оскуола оҕолоро Тимуровскай хамаанданан тахсан, кыаммат ыалларга маастарын саһааннаан биэриэхтэрэ уонна манна хаалбыт мас хатырыгын, сыыһын бүтүннүү хомуйуохтара. Бу үлэҕэ, биллэн турар, элбэх техника көлөтө тутулунна. Маныаха Вячеслав Нестеров 1 т. солярканан көмөлөспүтүн бэлиэтиибит. Олус бэрт үлэ бырааһынньыга буолла, биһиги нэһилиэктэн туора туран хаалбыт суоҕун кэриэтэ. Бары сомоҕолоһон үлэлээтибит”, — диэн кэпсиир депутат.

Кэлбит ыалдьыттар, Нуораҕана олохтоохторо бары аатырар эстрада сулустарын концерын тутан олорон көрөн астыннылар, бириистэри туруорууга сааҕа, телевизорга, холодильникка отон да атын сыаналаах бириистэри сүүйэн дьоллонулар. Ону тэҥэ кэлбит дьон бары НХЗ GROUP олус минньигэс араас бурдук астарынан күндүлэнэн тарҕастылар.

“Үлэ күүһэ — 2019” бар дьону үлэ тула сомоҕолообута кэскили түстээтэ.

А.Шадрина